Білім күніне орай Жамбыл ауданының Шоқай ауылында №3 орта мектептің жаңа ғимараты пайдалануға берілді.
150 орындық білім нысанының ашылу салтанатына облыс әкімінің бірінші орынбасары Нұржан Календеров қатысып, ауылдықтарды қос қуанышымен құттықтады.
– Қазіргі таңда облыс мектептерінің материалдық-техникалық базасы нығайып, жаңа мектептер соғылып, апатты, үш ауысымды, оқушы орны тапшылығы бар мектептердің мәселесі тиімді шешімін табуда. Бұл өз кезегінде білім саласында бірқатар жетістіктерге жетуге мүмкіндік береді. Биыл білім саласына 284,8 миллиард теңге бөлінді десек, бұл облыс бюджетінің 50 пайызынан астамы.
Ағымдағы жылы 25 білім нысанының құрылысы жүруде. Жыл соңына дейін 9 мектеп пен 5 мектептің жапсарлас құрылысы аяқталып, пайдалануға беріледі. Ал, 11 нысан құрылысы 2024 жылы аяқталады.
Бұдан бөлек, 17 білім беру нысаны күрделі жөндеуден өтуде. Сондай-ақ, 2,5 миллиард теңгеге мектептер жаңғыртылуда, оның ішінде білім беру нысандарының қауіпсіздігіне 1,8 миллиард теңге бөлінді.
Бүгін сіздердің ауылда салынып отырған мектептің жаңа ғимараты арқылы осы ауылда орналасқан орын тапшылығы бар №3 орта мектептің мәселесі шешіліп отыр. Енді балаларымыз кең, заманауи талапқа сай жабдықталған үлкен мектепте білім алады, – дей келе Нұржан Сәбитұлы балаларды білім мен тәрбие алуларыңыз үшін осындай қолдаулар мемлекет тарапынан жалғаса беретінін атап өтті. Сондай-ақ, ол облыс басшысының атынан мектепке 10 ноутбукты сыйға тапсырды.
Ғимарат құрылысын жүргізген «Тараз Строй-2004» жауапкершілігі шектеулі серіктестігінің мекеме басшысы Қуат Баққараев мектептің символикалық кілтін директоры Жандос Досқожаға тапсырды.
Жаңа мектеп асхана, спорт және мәжіліс залы, шеберхана, кітапхана, тігін бөлмесі, робототехника секілді қажетті бөлмелермен жан-жақты қамтылған.
Білім ордасы 200-ден аса оқушы оқиды десек, олардың жартысынан астамы ыстық тамақпен қамтылады.
Нұрперзент Туғанбай