Мемлекет басшысының айтуынша, 1995 жылғы Конституция қабылданған кезде басты назар мемлекеттік биліктің негіздерін нығайтуға аударылды. Ол кезеңде бұл шешім толықтай орынды болды, себебі Тәуелсіздігін енді ғана алған Қазақстанға заңнамалық тұрғыдан берік негіз қажет еді. Ата заң елдегі мемлекеттік институттардың қалыптасуына және мемлекет құрылысын нығайтуға оң ықпал етті.
Президент қазіргі қолданыстағы Конституцияны сынға алудың қажеті жоқ екенін айтты. Оның пікірінше, бұл құжат елдің тұрақты дамуына, саяси жүйенің қалыптасуына және мемлекеттің іргесінің бекемделуіне үлкен үлес қосты.
Сонымен қатар Қасым-Жомарт Тоқаев Қазақстанның Тұңғыш Президенті Нұрсұлтан Назарбаевтың тарихи миссиясын ұмытпау қажет екенін атап өтті. Оның айтуынша, еліміздің тәуелсіз мемлекет ретінде қалыптасуында Елбасының еңбегі ерекше.
Президент қазіргі таңда Қазақстанда «Адам мемлекет үшін емес, мемлекет адам үшін» деген қағидаттың маңызы артып отырғанын жеткізді. Бұл ұстаным жаңа Конституцияның мазмұнында да айқын көрініс тапқан.
Ата заңда адам құқықтары мен бостандықтарын қорғауға ерекше мән берілген. Конституциядағы ең үлкен бөлім – 30 бап – осы мәселеге арналған. Бұл негізгі заңның шамамен үштен бірін құрайды, ал Президент туралы бөлім небәрі 10 баптан тұрады.
Сондай-ақ Конституция деңгейінде тарихи, мәдени, отбасылық және адамгершілік құндылықтарды қорғау мәселесі де айқын белгіленген. Мемлекет басшысы отбасының қоғамдағы маңызына тоқталып, дәл осы институт ұлттың болашағын қалыптастыратынын айтты.
Президент азаматтардың құқықтары мен мүдделерін қорғау мемлекеттің басты міндеті екенін атап өтті. Оның айтуынша, бұл еліміздің егемендігі мен ұлттың тұрақты болашағына тікелей қатысты мәселе.