Жамбыл облысының әкімі Ербол Қарашөкеевтің төрағалығымен өткен аппараттық кеңесте су тасқыны кезеңіне дайындық жұмыстарының барысы талқыланды. Күн тәртібіндегі мәселе бойынша облыстық төтенше жағдайлар департаменті бастығының міндетін атқарушы Азат Әбдіразақов баяндама жасады.
Өңірдегі 42 елді мекен су тасқыны қаупі бар аймақта орналасқан. Жүргізілген алдын алу жұмыстарының нәтижесінде 34 елді мекенде су басу қаупі толық жойылып, 2 елді мекенде қауіп айтарлықтай төмендетілді.
2026 жылғы су тасқыны кезеңіне дайындық аясында облыс аумағында ауқымды іс-шаралар атқарылды. Атап айтқанда, «Шоң-Қақпа» су қоймасынан Талас өзеніне тасталатын суды қауіпсіз өткізу және көлемін азайту мақсатында елді мекендерді су басу қаупі бар 8 учаске анықталып, өзен арналары нығайтылды.
Тараз қаласы аумағынан өтетін жалпы ұзындығы 82,55 шақырымды құрайтын 8 ирригациялық каналға механикалық тазалау жұмыстары жүргізілді. Сонымен қатар Меркі, Мойынқұм, Сарысу, Т. Рысқұлов және Қордай аудандарында арық жүйелері мен өзен арналары тазаланып, кеңейтілді, дренаж жүйелері қазылып, өзен жағалаулары бекітілді.
Қазіргі таңда облыста 119 мың адамға арналған 396 зардап шеккен халықты қабылдау пункті, 32 шатыр, 890 төсек және 460 жиналмалы кереует дайын. Тамақтандыруды ұйымдастыру және арнайы техникаларды тарту бойынша 58 келісімшарт жасалған.
Көктемгі су тасқыны кезеңінде төтенше жағдайлардың алдын алу және жою үшін 1 927 адам, 485 бірлік техника және 132 су айдау құралы дайындықта тұр.
Қазіргі таңда облыс аумағындағы өзендердегі су деңгейі тұрақты, тәулік бойы мониторинг жүргізілуде.
Кеңес барысында Ербол Қарашөкеев су тасқыны кезеңіне дайындық жұмыстарын күшейтудің маңыздылығына ерекше тоқталды.
– Қазіргі таңда жауын-шашын мөлшері соңғы жылдармен салыстырғанда аз. Дегенмен, бұл мәселе күн тәртібінен түспеуі тиіс. Алда қыстың екі айға жуық кезеңі бар. Көктемде жауын-шашын мол түссе, жағдай күрделенуі мүмкін. Арқаны кеңге салуға болмайды. Біз кез келген табиғи құбылысқа дайын болуымыз қажет, – деді өңір басшысы.
Аталған мәселе бойынша жауапты тұлғаларға техникалардың дайындығын қатаң бақылауға алу, су тасқыны қаупі бар елді мекендерде қажетті резервтер мен мобильді топтар құру, ауа райына тұрақты мониторинг жүргізу, гидротехникалық құрылыстарда тәуліктік кезекшілікті қамтамасыз ету, су қоймалары мен көлдердің сыйымдылығына талдау жүргізу және өзге де міндеттер жүктелді.
Басқосуда халықтың әлеуметтік осал топтарын тұрғын үймен қамту мәселесі де талқыланды.
Құрылыс басқармасының басшысы Ерлан Орынбаевтың айтуынша, 2025 жылы 768,9 мың шаршы метр тұрғын үй пайдалануға берілген. Коммуналдық тұрғын үй қорынан пәтер алу кезегінде тұрған халықтың әлеуметтік осал топтарына жататын 1 545 отбасы баспаналы болды. Биыл осы санаттағы тағы 350 отбасын тұрғын үймен қамту жоспарланып отыр.
Облыс әкімі осал топтағы азаматтар үшін сатып алынатын пәтерлердің құрылыс-монтаж жұмыстарын уақытылы әрі сапалы аяқтауды, сондай-ақ пәтер сатып алу бойынша өткізілетін конкурстарды заңнама талаптарына сай жеделдетуді тапсырды.