Қордай ауданының Қаракемер ауылында «Асарлатып үй салу» жобасы аясында тағы бір отбасы баспаналы болды.
Бірнеше жылдан бері облыста жүзеге асып жатқан игі жоба аясында бұл жолы мүмкіндігі шектеулі жолдасын бағып отырған Күлсара Райымқұлова қоныс той иесі атанды.
Қоныс той қуанышына аудан әкімінің орынбасары Дамира Сүгірбай қатысып, ізгі тілегін білдірді.
– Асар – ұлттық мәдениетіміздің мәйегі, бірлігіміздің, елдігіміздің бірден-бір көрінісі. Бүгін баспаналы болып отырған отбасын құттықтаймын. Бұл үйде тек шаттық пен қуаныш болсын. Биыл аудан бойынша 16 үй аталған жоба аясында берілуі тиіс. Бұл – жетінші үй. Қоныстарыңыз құтты болсын, еліміз аман болғай, – деді Д.Сүгірбай.
Пайдалануға берілген үш бөлмелі баспананың газ, суы толық қосылып, барлық жағдайы жасалған. Қоныс тоймен құттықтап келген қаракемерліктер ауылдастарына одан әрі де қолдау көрсететіндіктерін жеткізді.
Айта кетейік, Қордай ауданында ағымдағы жыл басынан бері жеті үй асар әдісімен пайдалануға берілсе, жыл соңына дейін тағы 10 отбасын баспанамен қамту жоспарда.
Құрмаш Қаптағай