Тараз қаласының әкімі Бақытжан Орынбеков жамбылдық журналистер қауымымен кездесу өткізуде. Жиында жасаған баяндамасында қала басшысы облыс орталығында мүмкіндігі шектеулі жандарға арналған монша ашылатынын айтты.
– 2023 жылы «Мамыр» саябағының аумағында мүмкіндігі шектеулі азаматтаға арналған 30 орындық монша және иппотерапия орталығы салынады. Ал 2023-2024 жылдары 15-ші және 14-ші шағын аудандарда 2 әлеуметтік бейімдеу орталығының құрылысы аяқталып, пайдалануға беріледі, – деді Б. Орынбеков жиында.
Жалпы, аталған жылдар ішінде денсаулық сақтау саласында 28 млрд. теңгеге 13 жоба іске асырылмақ. Атап айтқанда, 6 жаңа нысанның құрылысы жүргізіліп, пайдалануға беріледі. 4 аурухана қайта жаңғыртудан, 3 нысан күрделі жөндеуден өтеді. Бұл жұмыстар қала тұрғындарының сапалы медициналық қызмет алуына жағдай жасамақ.