Әлеуметтік желілерде Ақмола облысындағы интернатта балалар жәбір көріп жатқаны түсірілген видео тарады, деп хабарлайды «Jambyl-Taraz» ақпарат агенттігі nege.kz сайтына сілтеме жасап.
Аймақ полициясы оқиғаға түсінік берді. Кадрлардан екі баланы бойы ұзындау ұлдар ұрып жатқанын көруге болады. Онда бейәдеп сөздер де айтылады. Балалардың бірі оқиғаны видеоға түсіріп тұр. Ақмола облысы Полиция департаментінің баспасөз қызметі мәліметінше, оқиға 21 қазанда Степногорск мектеп-интернатында болған. ҚК-нің 141-бабы 1-бөлігі «Балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау» және ҚК-нің 194-бабы 2-бөлігі «Бопсалау» бойынша соталды тергеу басталды.
«Алдын ала мәлімет бойынша, 2021 жылдың 21 қазанында облыстық мамандандырылған спорттағы дарынды балаларға арналған мектеп-интернатының 8-сынып оқушыларының үшеуі 7-сынып оқушысын жеке келіспеушіліктеріне байланысты жаралаған және оны телефонға түсірген. Қазіргі уақытта сот-медициналық сараптама тағайындалды, тергеу жүріп жатыр», – деді полиция өкілдері.