Әр саланың өркендеуі оған жан-тәнімен берілген, кәсібін өмірлік мұратына айналдырған азаматтардың еңбегімен өлшенеді. Ветеринария саласында осындай абыройлы жолдан өтіп, саналы ғұмырын ел игілігіне арнаған мамандардың бірі – Тазабеков Серік Сапарбайұлы.
Серік Сапарбайұлы 1987 жылы Жамбыл зооветеринариялық техникумын тәмамдап, сол жылы еңбек жолын Талас ауданында ветеринариялық фельдшер ретінде бастады. Жас маман алғашқы күннен-ақ өзінің жауапкершілігімен, еңбекқорлығымен және кәсіби біліктілігімен ерекшеленді. Ауыл шаруашылығының дамуына, мал басының амандығы мен жұқпалы аурулардың алдын алуға бағытталған жұмыстарға белсене араласып, халықтың сеніміне ие болды.
Жылдар өте келе мол тәжірибе жинақтап, ветеринария саласының білгір маманына айналды. Ол қай қызметте жүрсе де өз ісіне адалдық танытып, ветеринариялық-санитариялық қауіпсіздікті қамтамасыз ету, эпизоотиялық тұрақтылықты сақтау, жануарлар ауруларының алдын алу бағытындағы жұмыстарды жоғары жауапкершілікпен атқарып келеді.
2013 жылдан бері Серік Сапарбайұлы Тараз қаласының ветеринариялық бөлімінде жемісті еңбек етуде. Ұжымда ол тек тәжірибелі маман ғана емес, жастарға ақыл-кеңесін аямайтын тәлімгер, адамгершілігі мол, қарапайым әрі көпке сыйлы азамат ретінде құрметке ие. Оның көп жылғы еңбегі мен кәсіби тәжірибесі ұжымның дамуына елеулі үлес қосып келеді.
«Ветеринария – халық денсаулығының қорғаны» деген сөздің мәнін өз еңбегімен дәлелдеп жүрген Серік Сапарбайұлы үшін әр жұмыс күні – ел алдындағы жауапкершілік. Ол мамандығына деген адалдығының арқасында әріптестерінің де, тұрғындардың да зор құрметіне бөленген.
Бүгінде ветеринария саласы жаңа талаптарға сай жаңғырып келеді. Осындай өзгерістер кезеңінде мол тәжірибесімен жас мамандарға бағыт-бағдар беріп жүрген Серік Сапарбайұлы сынды азаматтардың еңбегі әрдайым жоғары бағалауға лайық.
Ветеринария қызметкерлері күні қарсаңында көпжылдық адал еңбегімен ерекшеленген Серік Сапарбайұлына шынайы алғысымызды білдіреміз. Деніне саулық, отбасына амандық, еңбегіне береке, ел игілігі жолындағы қызметіне толайым табыс тілейміз. Еңбек жолыңыз әрдайым абырой мен құрметке толы болсын!